नागपूर: पत्नी व मुलाची गळा आवळून हत्या केल्यानंतर राइस मिल संचालकाने गळफास घेऊन आत्महत्या केली. ही थरारक घटना मौदा तालुक्यातील अरोली पोलिस ठाण्याच्या हद्दीतील निमखेडामधील शांतीनगर येथे गुरुवारी सकाळी उघडकीस आली. या घटनेने पोलिसांमध्ये प्रचंड खळबळ उडाली आहे. श्रीनिवास इंडूपुगंटी (वय ५८), श्रीपद्मलता श्रीनिवास इंडूपुगंटी (वय ५५) आणि चंद्रशेखर श्रीनिवास इंडूपुगंटी (वय २७), अशी मृतकांची नावे आहेत.
पोलिसांनी दिलेल्या माहितीनुसार, श्रीनिवास यांचे दुमजली प्रशस्त घर आहे. पहिल्या माळ्यावर, ते, पत्नी ,मुलगा व सून चांदनी यांच्यासोबत राहायचे. तर तळ मजल्यावर श्रीनिवास यांचे सासू सासरे राहतात. बुधवारी रात्री सर्वांनी जेवन केले. त्यानंतर श्रीनिवास, त्यांच्या पत्नी श्रीपद्मलता या खोलीत झोपायला गेले. चंद्रशेखर हा त्याच्या खोलीत झोपला. अन्य एका खोलीत चांदनी या टीव्ही बघत होत्या. रात्री ११ वाजताच्या सुमारास त्या तेथेच झोपी गेल्या.
यादरम्यान श्रीनिवास यांनी दोरीने पत्नीचा गळा आवळून खून केला.त्यानंतर उशीने त्यांचे तोंड दाबले. श्रीनिवास हे चंद्रशेखर याच्या खोलीत गेले. त्याचाही अशाचप्रकारे खून केला व खोलीत परतले. लोखंडी गजाला दोरी बांधून श्रीनिवास यांनी आत्महत्या केली.
सकाळी ६ वाजताच्या सुमारास चांदनी यांना जाग आली. त्या खोलीत गेल्या असता चंद्रशेखर हे मृतावस्थेत दिसले. चांदनी या श्रीनिवास यांच्या खोलीत गेल्या असता दोघेही मृतावस्थेत होते. याचा जबर धक्का चांदनी यांना बसला. त्यांनी आरडाओरड केली. श्रीनिवास यांचे सासूसासरे पहिल्या माळ्यावर आले. शेजारी जमले. एका नागरिकाने अरोली पोलिसांना माहिती दिली. माहिती मिळताच पोलिस अधीक्षक हर्ष पोद्दार यांच्यासह पोलिसांचा प्रचंड ताफा तेथे पोहोचला. पंचनामा करून पोलिसांनी तिघांचे मृतदेह हॉस्पिटलकडे रवाना केले. याप्रकरणी पोलिसांनी खुनाचा गुन्हा दाखल करून तपास सुरू केला आहे.
