अकोल्यात एका वहिनीने दिराच्या प्रेमात वेडी होऊन क्रूरतेचा कळस गाठला आणि पतीसोबत भयानक कृत्य केलं. ही घटना अकोला जिल्ह्यातील बाळापूर तालुक्यातील तामशी गावात घडल्याची माहिती आहे. प्रेमात पतीचा अडसर होत असल्याने पत्नीनेच त्याचा काटा काढला. प्रमोद मेसरे असं मृत पतीचं नाव आहे. तर मंगला मेसरे असं आरोपी पत्नीचं नाव आहे.
पतीचा चुलत भाऊ नेहमी घरी यायचा. यातच दोघांची नजरभेट झाली अन् हळूहळू संवाद वाढला. त्यातून जवळीकता निर्माण झाली आणि वहिनी दिराचं सूत जुळलं. परंतु आता पती प्रेमात अडसर ठरू लागल्याने पत्नीने प्रियकराच्या (दिराच्या) मदतीनं पतीची गळा आवळून हत्या केली. विशेष म्हणजे ही हत्या नसून अपघाती मृत्यू असल्याचा बनावही दोघांनी रचला. पण, दोन दिवसांत त्यांचे हे बिंग फुटले. याप्रकरणी पोलिसांनी पत्नी आणि प्रियकर दिराला अटक केली
नेमकं प्रकरण काय?
मिळालेल्या माहितीनुसार, अकोला जिल्ह्यातील तुलुंगा गावातील प्रमोद मेसरे आणि मंगला मेसरे दामत्य बाळापूर तालुक्यातल्या तामशी गावातील वीट भट्टीवर कामासाठी आलं होतं. दरम्यान, इथं काम करत असताना अचानक प्रमोदचा मृत्यू झाला. या संदर्भात पत्नीने बाळापूर पोलिसांना माहिती दिली आणि पोलिस घटनास्थळी दाखल झाले. रात्री गाढ झोपेत असताना त्यांना हृदयविकाराचा झटका आला आणि त्यातूनच त्यांचा मृत्यू झाला, असं तिने पोलिसांना सांगितलं.
याप्रकरणी पोलिसांनी सुरुवातीला आकस्मित मृत्यूची नोंद केली आणि तपास सुरू केला. या प्रकरणाचा सखोल तपास एपीआय पंकज कांबळे यांनी केला. सुरुवातीला पत्नीनं सांगितलं की पती दारूला व्यसनाधीन गेलेला होता. त्यामुळे हा आकस्मित मृत्यू असल्याचं भासवलं.
दोन दिवसानंतर प्रमोदचा वैद्यकीय अहवाल समोर आला आणि यात त्याचा गळा आवळून खून केल्याचं निष्पन्न झालं. पोलिसांनी या प्रकरणात धागेदोरे तपासले असता, मृत प्रमोद याची पत्नी मंगला आणि दिराचं प्रेमप्रकरण सुरु असल्याचं कळालं. या प्रकरणात बाळापूर पोलिसांनी दोघांची कसून चौकशी केली. तेव्हा त्यांनी दोरीनं गळा आवळून प्रमोदची हत्या केल्याची कबूली दिली. पोलिसांनी वहिनी मंगला आणि दिर गोटू यांना अटक केली.
