मालेगाव : धुळे-मालेगाव लोकसभा मतदारसंघातील निवडणूक प्रचार अंतिम टप्प्यात आला आहे. मात्र, ग्रामीण भागात महायुतीतील भाजपचे उमेदवार खासदार डॉ. सुभाष भामरे यांचा प्रचारासाठी जाणाऱ्या पदाधिकारी, कार्यकर्त्यांना कांदा उत्पादक शेतकरी, ग्रामस्थांच्या रोषाला सामोरे जावे लागत आहे.
कांदाप्रश्नावरून आक्रमक शेतकऱ्यांकडून भाजपच्या प्रचारकांना गावात येण्यास विरोध केला जात असल्याचे व्हिडीओ ‘सोशल मीडिया’वर व्हायरल होत असून, त्यामुळे खासदार भामरेंपुढील अडचणींत वाढ झाली आहे. मालेगाव, तसेच बागलाण तालुक्यात सध्या डॉ. भामरे यांच्या प्रचारासाठी भाजप पदाधिकारी, कार्यकर्ते ग्रामीण भागात भेटी देत आहेत. परंतु, स्थानिक शेतकरी, ग्रामस्थांकडून, दहा वर्षांत गावासाठी काय विकासकामे केलीत, कांदा निर्यातबंदी का केली, अशा प्रश्नांची सरबत्ती करीत पदाधिकारी व कार्यकर्त्यांना धारेवर धरले जात आहे. प्रामुख्याने कांदा पिकाविषयी केंद्र सरकारने घेतलेल्या निर्णयाबद्दल शेतकऱ्यांमध्ये नाराजी असून, त्याचाच रोष शेतकरी भाजप पदाधिकाऱ्यांकडे व्यक्त करताना दिसत आहेत.
रामपुरा गावातील व्हायरल व्हिडीओत भाजपचे मालेगाव तालुकाध्यक्ष नीलेश कचवे, माजी जिल्हाध्यक्ष दादा जाधव यांच्याकडे तेथील ग्रामस्थ गेल्या दहा वर्षांत गावाची पिण्याच्या पाण्याची समस्या खासदारांनी सोडवली नाही म्हणून नाराजी व्यक्त करताना दिसतात.
दुसऱ्या व्हिडीओत किकवारी खुर्दमधील कांदा उत्पादक शेतकरी केंद्राने केलेली कांदा निर्यातबंदी, आकारलेले निर्यात शुल्क यावरून भाजप पदाधिकाऱ्यांना जाब विचारताना दिसत आहेत. त्यामुळे भाजप पदाधिकारी, कार्यकर्त्यांना माघारी फिरावे लागत आहे.
