दोन वर्षांच्या लेकीसमोरच अल्पवयीन चिमुकलीवर अत्याचार, पुण्यातील घटनेने खळबळ, अखेर...

घटनेच्या वेळी पीडितेचे वय दहा वर्षांपेक्षा कमी होते. पोक्सो कायद्याच्या कलम तीन व पाचनुसार, आरोपीविरोधात बलात्काराचा गुन्हा सिद्ध झाला आहे: तसेच आरोपीविरोधात पोक्सो कायद्याच्या कलम सात व अकरा आणि भारतीय दंड संहितेच्या कलमांनुसार विनयभंग व लैंगिक अत्याचाराचे गुन्हे सिद्ध होतात, असे निकालात नमूद करीत आरोपीला शिक्षा सुनावण्यात आली.

पुणे: इयत्ता सहावीत शिकणाऱ्या मुलीवर वारंवार लैंगिक अत्याचार करणाऱ्या नराधमाला विशेष न्यायालयाने जन्मठेप व सतरा हजार रुपये दंडाची शिक्षा सुनावली आहे. लैंगिक अत्याचारापासून बालकांचे संरक्षण कायद्याच्या कलम तीन आणि पाचच्या तरतुदीनुसार आरोपीने चिमुकल्या पीडितेवर लैंगिक अत्याचार केल्याचे सिद्ध झाल्याचे नमूद करून विशेष न्यायाधीश पी. आर. चौधरी यांनी हा निकाल दिला.

या खटल्यात पीडितेने निर्भयपणे आरोपीविरोधात दिलेली साक्ष महत्त्वाची ठरली. या घटनेच्या वेळी पीडितेचे वय अकरा वर्षांपेक्षा कमी असल्याचे तिच्या जन्मतारखेच्या पुराव्याच्या आधारे विशेष सरकारी वकील पुष्कर सप्रे यांनी सप्रमाण सिद्ध केले. पीडिता ही या घटनेची एकमेव साक्षीदार असून, घटनेनंतर पाच वर्षांनंतरही तिने दिलेली साक्ष अबाधित ठरली आहे. आरोपीने पीडितेचा विनयभंग करून तिच्यावर लैंगिक अत्याचार केल्याचा आरोप सरकारी पक्षाकडून सिद्ध करण्यात आला. त्यानंतर न्यायालयाने आरोपीला जन्मठेप ठोठावली; तसेच मनोधैर्य योजनेअंतर्गत दंडाची रक्कम पीडितेला देण्यात यावी, असेही न्यायालयाने आदेशात नमूद केले आहे.

संजू भागवत निकुंभ असे शिक्षा झालेल्याचे नाव आहे. त्याच्याविरोधात पीडितेच्या आईने भारती विद्यापीठ पोलिस ठाण्यात तक्रार दिली होती. ही घटना सहा ऑगस्ट २०१७ रोजी घडली. त्या दिवशी रविवार असल्याने पीडिता व तिचा भाऊ दोघे घरात होते, तर आई-वडील दोघे कामावर गेले होते. पीडिता आरोपीच्या दोन वर्षांच्या मुलीला खेळवत होती, तर तिचा भाऊ बाहेर खेळायला गेला होता. त्या वेळी आरोपीने घरात शिरून पीडितेवर लैंगिक अत्याचाराचा प्रयत्न केला. पीडितेने आरडाओरडा केल्यावर तो घरातून पसार झाला.

सायंकाळी पालक घरी आल्यावर त्यांना पीडिता रडताना दिसली. आईने विश्वासात घेऊन विचारणा केल्यावर पीडितेने घडलेला प्रकार सांगितला. आरोपीने यापूर्वीही चार ते पाच वेळा लैंगिक अत्याचार केल्याचे सांगितले. त्यानंतर तिच्या आईने पोलिसांकडे धाव घेऊन तक्रार दाखल केली. पोलिसांनी या प्रकरणी गुन्हा दाखल करून पीडितेला वैद्यकीय तपासणीसाठी पाठवले; तसेच आरोपीला अटक करून आरोपपत्र दाखल केले. या खटल्यात विशेष सरकारी वकील पुष्कर सप्प्रे यांनी काम पाहिले. त्यांनी सरकार पक्षातर्फे चार साक्षीदार तपासले. त्यामध्ये पीडिता व तिच्या आईची साक्ष महत्त्वाची ठरली.

पीडितेच्या साक्षीनुसार, आरोपीने लैंगिक अत्याचार व विनयभंगाचे कृत्य केले असल्याचे सिद्ध होते. पीडिता अल्पवयीन असून, आरोपीने केलेला गुन्हा सिद्ध झाल्याने त्याला कठोर शिक्षा ठोठावण्यात यावी, असा युक्तिवाद विशेष सरकारी वकील पुष्कर सप्रे यांनी केला. तो ग्राह्य धरून न्यायालयाने आरोपीला जन्मठेप सुनावली.