विजय मिरवणुकीतून उसळला वाद, हिंसाचारात रूपांतर
नगरपालिका निवडणुकीनंतर माजी आमदार शिरीष चौधरी यांचे पुत्र प्रथमेश चौधरी यांची उपनगराध्यक्षपदी निवड झाली होती. या निवडीच्या आनंदात काढण्यात आलेल्या विजय मिरवणुकीदरम्यान दोन गटांमध्ये जोरदार वाद झाला. पाहता पाहता हा वाद हाणामारीत बदलला. परिस्थिती नियंत्रणाबाहेर गेल्यानंतर त्याच रात्री संतप्त जमावाने माजी आमदार चौधरी यांच्या निवासस्थानी तोडफोड केल्याची घटना घडली. या प्रकारामुळे संपूर्ण शहरात तणावाचे वातावरण निर्माण झाले होते.
परस्परविरोधी तक्रारी, गुन्ह्यांची नोंद
या घटनेनंतर दोन्ही बाजूंनी एकमेकांविरोधात नंदूरबार शहर पोलिस ठाण्यात तक्रारी दाखल करण्यात आल्या. त्यानुसार शिरीष चौधरी यांच्याविरोधात दरोडा आणि अॅट्रोसिटी (अनुसूचित जाती-जमाती अत्याचार प्रतिबंधक कायदा) अंतर्गत गंभीर स्वरूपाचे गुन्हे नोंदवण्यात आले. या प्रकरणाचा तपास सुरू असतानाच आज पोलिसांनी चौधरी यांना ताब्यात घेतले. दरम्यान, चौधरी यांच्या फिर्यादीवरून दाखल झालेल्या गुन्ह्यातील काही संशयित आरोपींनाही पोलिसांनी अटक केल्याची माहिती आहे.
अटकेनंतर प्रकृती बिघडली
पोलिस कारवाईदरम्यान शिरीष चौधरी यांची अचानक तब्येत खालावली. त्यानंतर त्यांना तातडीने जिल्हा रुग्णालयात दाखल करण्यात आले. डॉक्टरांकडून त्यांच्यावर उपचार सुरू असून, वैद्यकीय सल्ल्यानुसार पुढील कारवाई केली जाणार आहे, अशी माहिती पोलिस सूत्रांनी दिली.
राजकीय वर्तुळात खळबळ
शिरीष चौधरी हे नंदूरबार जिल्ह्यातील वजनदार आणि प्रभावी नेते म्हणून ओळखले जातात. त्यांच्या अटकेमुळे राजकीय वर्तुळात मोठी खळबळ उडाली असून, समर्थकांमध्ये अस्वस्थता पसरली आहे. निवडणुकांच्या तोंडावर सत्ताधारी गटातील माजी आमदारावर झालेली ही कारवाई अनेक तर्क-वितर्कांना जन्म देत आहे.
निवडणुकांवर काय परिणाम?
एकीकडे जिल्हा परिषद आणि पंचायत समिती निवडणुकांसाठी उमेदवारी अर्ज भरण्याची प्रक्रिया सुरू असतानाच, दुसरीकडे या अटकेमुळे जिल्ह्यातील राजकीय समीकरणे बदलण्याची शक्यता वर्तवली जात आहे. पोलिस तपासातून नेमके काय निष्पन्न होते आणि या प्रकरणाचा आगामी निवडणुकांवर किती प्रभाव पडतो, याकडे संपूर्ण जिल्ह्याचे लक्ष लागले आहे.
