नागपूर शहराला हादरवून सोडणारी एक धक्कादायक घटना समोर आली असून, प्रेमप्रकरणाचा शेवट थेट रक्तरंजित हत्येत झाला आहे. कळमेश्वर रोडवरील फेटरी गाव परिसरातील एका OYO हॉटेलमध्ये प्रियकरानेच आपल्या प्रेयसीची निर्घृण हत्या केल्याची घटना उघडकीस आली आहे. या घटनेमुळे परिसरात एकच खळबळ उडाली आहे.
मृत तरुणीचे नाव रुचिता भांगे (वय अंदाजे 22 ते 23) असे असून, प्रेमसंबंधातून निर्माण झालेल्या वादातून हा थरारक प्रकार घडल्याचे प्राथमिक तपासात स्पष्ट झाले आहे. OYO हॉटेलच्या खोलीत दोघांमध्ये जोरदार वाद झाला. हा वाद इतका टोकाला गेला की, संतप्त प्रियकराने चाकूने थेट रुचिताच्या गळ्यावर वार केला. गंभीर जखमी झालेल्या रुचिताचा काही वेळातच रक्तस्रावामुळे मृत्यू झाला.
हत्या केल्यानंतर आरोपी प्रियकराने पकडले जाण्याच्या भीतीने हॉटेलच्या पहिल्या मजल्यावरून उडी मारून घटनास्थळावरून पळ काढला. या थरारक घटनेची माहिती मिळताच पोलिसांनी तातडीने घटनास्थळी धाव घेतली. हॉटेलची खोली रक्ताने माखलेली असून, घटनास्थळाचे दृश्य अंगावर काटा आणणारे होते.
पोलिसांनी मृतदेह ताब्यात घेऊन तो शवविच्छेदनासाठी शासकीय रुग्णालयात पाठवला आहे. याप्रकरणी गुन्हा नोंदवण्यात आला असून, फरार आरोपीचा शोध घेण्यासाठी विशेष पथके रवाना करण्यात आली आहेत. हॉटेलमधील सीसीटीव्ही फुटेज, मोबाईल कॉल डिटेल्स आणि स्थानिक माहितीच्या आधारे तपास वेगाने सुरू आहे.
दरम्यान, नागपूरच्या मानकापूर पोलीस ठाण्याच्या हद्दीतील गोधणी परिसरात देखील प्रेमातूनच घडलेला आणखी एक धक्कादायक प्रकार उघडकीस आला आहे. 23 वर्षीय प्राची खापेकर या तरुणीची एकतर्फी प्रेमातून हत्या करण्यात आल्याचे पोलिस तपासात निष्पन्न झाले आहे. विशेष म्हणजे, आरोपीने हत्या केल्यानंतर हा प्रकार आत्महत्येसारखा वाटावा, असा बनाव रचल्याचेही पोलिसांच्या तपासात समोर आले आहे.
सलग समोर येणाऱ्या या घटनांमुळे नागपूरमध्ये प्रेमप्रकरणांच्या नावाखाली वाढणाऱ्या गुन्हेगारीवर गंभीर प्रश्नचिन्ह उपस्थित झाले आहे. प्रेम, संशय, राग आणि नकार स्वीकारता न आल्याने तरुणांच्या हातून घडणारे हे टोकाचे कृत्य समाजासाठी चिंताजनक ठरत आहे.
पोलिसांकडून दोन्ही प्रकरणांचा सखोल तपास सुरू असून, आरोपींना लवकरच अटक करण्यात येईल, असा विश्वास व्यक्त करण्यात आला आहे.
दरम्यान, या थरारक घटनांमुळे नागपूर शहरात भीतीचे वातावरण निर्माण झाले आहे.
