सोशल मीडियावर सुरू झालेल्या एका ‘प्रेमकथे’चा शेवट थेट सायबर गुन्ह्यात झाला असून एका व्यावसायिकाला तब्बल ५३ लाख रुपयांना गंडा घालणाऱ्या हनी ट्रॅप प्रकरणामुळे नाशिक पोलिसही चक्रावले आहेत. ‘सानवी खुराणा’ नावाने ओळख सांगणाऱ्या एका अज्ञात महिलेने आधी मैत्री आणि प्रेमाचे आमिष दाखवत व्यावसायिकाला जाळ्यात ओढले. त्यानंतर क्रिप्टो करन्सी ट्रेडिंगच्या नावाखाली लाखो रुपये उकळत अखेर खासगी फोटो-व्हिडिओ व्हायरल करण्याची धमकी देत
ब्लॅकमेल केल्याचे उघड झाले आहे.
या धक्कादायक प्रकरणी नाशिक शहर सायबर पोलिस ठाण्यात गुन्हा दाखल करण्यात आला असून वरिष्ठ पोलिस निरीक्षक संजय पिसे यांच्या मार्गदर्शनाखाली तपास सुरू आहे.
सोशल मीडियावरून मैत्री, नंतर प्रेमाचा सापळा
पोलिसांकडून मिळालेल्या माहितीनुसार, फिर्यादी असलेल्या व्यावसायिकाशी व्हॉट्सअॅप आणि फेसबुकच्या माध्यमातून ‘सानवी खुराणा’ या नावाने संपर्क साधण्यात आला. सुरुवातीला साध्या गप्पांमधून मैत्री वाढवण्यात आली. काही दिवसांतच त्या महिलेने प्रेमाचे आमिष दाखवत व्यावसायिकाचा विश्वास जिंकला.
विश्वास संपादन झाल्यानंतर संशयिताने क्रिप्टो करन्सी ट्रेडिंगमधून मोठा नफा मिळवून देण्याचे आमिष दाखवले आणि एका बनावट ट्रेडिंग प्लॅटफॉर्मवर खाते उघडण्यास भाग पाडले.
स्क्रीनवर कोट्यवधींचा नफा, प्रत्यक्षात मोठी फसवणूक
सुरुवातीला व्यावसायिकाने कमी रक्कम गुंतवली असता ट्रेडिंग प्लॅटफॉर्मवर कोट्यवधी रुपयांचा आभासी नफा दाखवण्यात आला. हा आकडा पाहून तो अधिकच भुलला. त्यानंतर संशयिताने वेगवेगळ्या कारणांवरून पैसे मागण्यास सुरुवात केली.
कधी ‘ट्रेडिंग कमिशन’, कधी ‘टॅक्स’, तर कधी ‘प्रोसेसिंग फी’ अशा विविध नावाखाली फिर्यादीकडून अनेक यूपीआय आयडी आणि बँक खात्यांवर पैसे भरून घेतले गेले. अशा प्रकारे एकूण ५२ लाख ९३ हजार २२८ रुपये उकळण्यात आले.
पैसे मागितल्यावर बदलले रूप
फिर्यादीने गुंतवलेली रक्कम आणि नफा परत देण्याची मागणी केली असता संशयित महिलेचे वर्तन अचानक बदलले. उलट अजून ३४ लाख रुपये भरण्याची मागणी करण्यात आली. व्यावसायिकाने पैसे देण्यास नकार दिल्यानंतर त्याला धक्काच बसला.
संशयिताने दोघांमध्ये संमतीने शेअर झालेले खासगी फोटो आणि व्हिडिओ त्यालाच पाठवत,
“पैसे दिले नाहीत तर हे व्हिडिओ सोशल मीडियावर व्हायरल करेन, तुझी बदनामी करेन आणि तुला संपवून टाकेन,” अशी धमकी दिली.
सायबर पोलिसांची कारवाई सुरू
घाबरलेल्या व्यावसायिकाने अखेर सायबर पोलिसांकडे धाव घेत तक्रार दाखल केली. पोलिसांनी संबंधित बँक खाते क्रमांक, यूपीआय आयडी तसेच व्हॉट्सअॅप आणि फेसबुक प्रोफाइलच्या आधारे तपास सुरू केला आहे. या प्रकरणामागे सायबर गुन्हेगारांच्या संघटित टोळीचा हात असण्याची शक्यता पोलिसांकडून वर्तवली जात आहे.
अशाच प्रकारचा आणखी एक गुन्हा
दरम्यान, काही दिवसांपूर्वी ‘तानिया शर्मा’ नावाच्या महिलेने एका व्यावसायिकाला तब्बल ४८ लाख ५५ हजार रुपयांचा गंडा घातल्याचे प्रकरणही उघड झाले होते. त्यामुळे सोशल मीडियावरील बनावट प्रोफाइलच्या माध्यमातून हनी ट्रॅप करून आर्थिक फसवणूक करणाऱ्या टोळ्यांची संख्या वाढत असल्याची भीती व्यक्त केली जात आहे.
पोलिसांचा इशारा
सायबर पोलिसांनी नागरिकांना सावध राहण्याचे आवाहन करताना सांगितले की,
सोशल मीडियावर अनोळखी व्यक्तींशी आर्थिक व्यवहार करू नयेत
क्रिप्टो गुंतवणुकीच्या आकर्षक ऑफरपासून सावध राहावे
खासगी फोटो-व्हिडिओ शेअर करताना अत्यंत सतर्कता बाळगावी
अन्यथा अशा हनी ट्रॅप आणि सायबर फसवणुकीच्या जाळ्यात अडकण्याचा धोका वाढतो, असा इशाराही पोलिसांनी दिला आहे
