सुळे (ता. शिरपूर) येथील भाविकांचा गट देवीच्या दर्शनासाठी पायी निघाला होता. भक्तिभावात चालत असतानाच अचानक भरधाव वेगाने आलेल्या कारने नियंत्रण गमावले आणि थेट भाविकांमध्ये घुसली. क्षणात आरडाओरड, धावाधाव आणि रक्ताचे थारोळे—असा भीषण प्रकार घडला.
या दुर्घटनेत सखूबाई बाबूलाल भिल (वय ३५) यांना जबर धडक बसून त्या गंभीर जखमी झाल्या. त्यांच्यासोबत असलेली मनीषा कालूसिंह पावरा (१६) ही तरुणीही जखमी झाली. दोघींना तातडीने उपजिल्हा रुग्णालयात हलवण्यात आले. मात्र, वैद्यकीय तपासणीत सखूबाई भिल यांना मृत घोषित करण्यात आले, तर मनीषावर उपचार सुरू आहेत.
अपघातानंतर घटनास्थळी एकच खळबळ उडाली. परिसरातील ग्रामस्थ मोठ्या संख्येने जमले. काही काळासाठी महामार्गावरील वाहतूक पूर्णपणे ठप्प झाली होती.
दरम्यान, धडक देणारी कार (बीएच २४, एच ६७१९) एका सैन्य अधिकाऱ्याच्या ताब्यात होती. तो कर्तव्यावर रुजू होण्यासाठी निघाला होता. कारचे टायर अचानक फुटल्याने वाहनावरील नियंत्रण सुटल्याचा प्राथमिक अंदाज व्यक्त केला जात आहे. अपघातानंतर संबंधित अधिकाऱ्याने परिस्थितीची गंभीरता ओळखून जवळच्या महामार्ग पोलिस मदत केंद्रात आश्रय घेतला आणि नंतर स्वतःहून पोलिसांसमोर हजर झाला.
घटनेची माहिती मिळताच स्थानिक आमदार काशीराम पावरा यांनी तातडीने घटनास्थळी व रुग्णालयात धाव घेतली. त्यांनी मृत महिलेच्या कुटुंबीयांचे सांत्वन करत जखमी तरुणीवर तातडीने उपचार करण्याच्या सूचना दिल्या.
पोलिसांनी घटनास्थळी दाखल होऊन जमाव पांगवला आणि परिस्थिती नियंत्रणात आणली. मात्र, या घटनेमुळे संपूर्ण परिसरात हळहळ व्यक्त होत असून, “देवीच्या दर्शनासाठी निघालेल्या भक्तावरच अशी वेळ का आली?” असा सवाल उपस्थित होत आहे.
श्रद्धेच्या वाटेवर मृत्यूची सावली पडल्याने संपूर्ण परिसर शोकसागरात बुडाला आहे.
