पहाटेच्या शांततेत जीवाशी खेळ सुरू होता… आणि नेमक्या वेळी पोलिसांनी धडक मारत मोठा अनर्थ टाळला! चाकण-शिक्रापूर रोडवरील भोसे गावच्या हद्दीत गॅस टँकरमधून घरगुती सिलिंडरमध्ये बेकायदा गॅस भरण्याचा धोकादायक प्रकार उघडकीस आला असून पोलिसांनी तिघांना रंगेहाथ अटक केली आहे. या कारवाईत तब्बल ₹४९ लाख ५७ हजार ६०० किमतीचा मुद्देमाल जप्त करण्यात आला आहे.
कसा उघड झाला जीवघेणा खेळ?
चाकण उत्तर पोलीस ठाण्याचे वरिष्ठ पोलीस निरीक्षक जितेंद्र कदम यांच्या मार्गदर्शनाखाली ही धडाकेबाज कारवाई पार पडली.
पोलीस उपनिरीक्षक चंद्रशेखर मोरखंडे यांना मिळालेल्या गोपनीय माहितीवरून पहाटे साडेचारच्या सुमारास पोलिसांनी सापळा रचला.
इंडियन ऑइल कंपनीच्या पार्किंगमध्ये उभ्या असलेल्या गॅस टँकरच्या आउटलेटचे सील तोडून त्याला काळ्या रंगाचा पाईप जोडण्यात आला होता. कोणतीही सुरक्षा साधने न वापरता घरगुती गॅस सिलिंडरमध्ये थेट रिफिलिंग सुरू होते. या वेळी पोलिसांनी छापा टाकत तिघांना ताब्यात घेतले.
हे आहेत अटक आरोपी
अंबादास रोहिदास गाडे (वय ४२, मूळ बीड)
अक्षय रमेश मुंगसे (वय २५, रा. रासे, खेड)
नवनाथ अंकुश होजगे (वय ३४, रा. भोसे, खेड)
या तिघांवर जीवनावश्यक वस्तू कायदा आणि इतर संबंधित कलमान्वये गुन्हा दाखल करण्यात आला आहे.
मोठा स्फोट टळला!
ही कारवाई काही मिनिटे उशिरा झाली असती तर मोठी दुर्घटना घडली असती, अशी भीती व्यक्त केली जात आहे. कारण:
टँकरचे सील तोडून थेट गॅस काढला जात होता
कोणतीही सेफ्टी उपकरणे नव्हती
परिसरात पेट्रोल पंप आणि वाहतूक होती
यामुळे स्फोट किंवा भीषण आग लागण्याचा धोका अत्यंत मोठा होता.
काळ्या बाजारासाठी चालला होता डाव
तपासात समोर आलेल्या माहितीनुसार, आरोपी स्वस्तात गॅस भरून तो घरगुती सिलिंडरमध्ये भरून चढ्या दराने विक्री करण्याच्या तयारीत होते. गॅस टंचाईच्या पार्श्वभूमीवर अशा रॅकेट्सना खतपाणी मिळत असल्याचे स्पष्ट झाले आहे.
इतिहास पुन्हा उभा राहिला असता…
दोन वर्षांपूर्वी याच चाकण-शिक्रापूर रोडवरील मोहितेवाडी परिसरात अशाच प्रकारे बेकायदा गॅस भरताना भीषण आग लागून टँकरचा स्फोट झाला होता. त्यात मोठे नुकसान झाले होते.
तरीही अशा घटना पुन्हा घडत असल्याने प्रशासनासमोर मोठे आव्हान उभे ठाकले आहे.
पोलिसांचा इशारा
पोलिसांनी स्पष्ट इशारा दिला आहे की,
👉 अशा जीवघेण्या आणि बेकायदेशीर कृत्यांवर कठोर कारवाई सुरूच राहणार
👉 नागरिकांनी संशयास्पद हालचाली दिसल्यास तात्काळ माहिती द्यावी
“नफा कमावण्याच्या हव्यासात जीव धोक्यात” — पोलिसांची ठाम भूमिका
चाकणमधील ही कारवाई केवळ गुन्हेगारांना पकडण्यापुरती मर्यादित नसून, शेकडो निरपराध नागरिकांचे प्राण वाचवणारी ठरली आहे.
अशा बेकायदा रॅकेट्सना आळा बसतो का, हे पाहणे आता महत्त्वाचे ठरणार आहे.
