जळगाव शहरातील औद्योगिक वसाहतीत शनिवारी दुपारी भीषण आग आणि स्फोटांच्या मालिकेमुळे अक्षरशः थरारक परिस्थिती निर्माण झाली. काही क्षणांतच दोन कंपन्या आगीच्या भक्ष्यस्थानी सापडल्या आणि संपूर्ण परिसर धुराच्या काळ्या ढगांनी वेढला गेला. सुदैवाने जीवितहानी टळली असली, तरी कोट्यवधी रुपयांचे नुकसान झाल्याचा प्राथमिक अंदाज व्यक्त करण्यात येत आहे.
घटनेची सुरुवात दुपारी सुमारे दोन वाजण्याच्या सुमारास झाली. ‘जे ब्रदर्स’ या कंपनीच्या गोदामातून अचानक धूर निघताना दिसला. पाहता पाहता हा धूर प्रचंड ज्वाळांमध्ये बदलला आणि काही मिनिटांतच आगीने संपूर्ण गोदाम गिळंकृत केले. खोबरेल तेल आणि विविध सुगंधी तेलांच्या साठ्यामुळे आग भडकण्याचा वेग प्रचंड वाढला.
आगीने वेग घेताच शेजारील ‘श्री एंटरप्रायझेस’ ही कंपनीही तिच्या कचाट्यात सापडली. प्लास्टिक चटया तयार करणाऱ्या या कंपनीत रसायने आणि ज्वलनशील साहित्य मोठ्या प्रमाणात साठवलेले असल्याने काही क्षणांतच येथेही आग पसरली. यानंतर परिसरात एकामागून एक भीषण स्फोटांचे आवाज घुमू लागले. तेलाचे डबे, केमिकल्सची पिंपे आणि प्लास्टिक साहित्य स्फोटून आकाशात ज्वाळांचे लोट उसळत होते.
स्फोटांच्या आवाजाने संपूर्ण औद्योगिक वसाहत हादरली. भीतीच्या वातावरणात कामगारांनी जीव वाचवण्यासाठी बाहेर पळ काढला. अनेकांनी सुरक्षित अंतर राखत परिसर रिकामा केला. काही नागरिकांनीही घर सोडून सुरक्षित ठिकाणी आश्रय घेतला.
माहिती मिळताच पोलीस आणि अग्निशमन दलाची पथके तातडीने घटनास्थळी दाखल झाली. आगीची तीव्रता इतकी प्रचंड होती की, नियंत्रण मिळवण्यासाठी अनेक तास झुंज द्यावी लागली. विविध ठिकाणांहून अतिरिक्त अग्निशमन बंब मागवण्यात आले. सतत होणारे स्फोट, दाट धूर आणि प्रचंड उष्णता यामुळे बचावकार्याला अडथळे निर्माण होत होते. तरीही अग्निशमन दलाने धैर्य आणि समन्वय दाखवत अखेर आग आटोक्यात आणली.
या भीषण आगीत दोन्ही कंपन्यांचे गोदाम पूर्णतः जळून खाक झाले. कच्चा माल, तयार उत्पादने, पॅकिंग साहित्य आणि महागडी यंत्रसामग्री जळून नष्ट झाली. प्राथमिक अंदाजानुसार कोट्यवधी रुपयांचे नुकसान झाले असून अनेक कामगारांच्या रोजगारावर याचा परिणाम होण्याची शक्यता आहे.
प्रशासनाने दिलेल्या माहितीनुसार, आगीचे नेमके कारण अद्याप स्पष्ट झालेले नाही. मात्र, शॉर्ट सर्किट किंवा तांत्रिक बिघाडामुळे ही आग लागल्याचा प्राथमिक अंदाज आहे. संबंधित विभागाकडून पंचनामा सुरू असून सखोल तपास करण्यात येत आहे.
घटनेनंतर परिसरात कडक पोलीस बंदोबस्त तैनात करण्यात आला असून नागरिकांना त्या भागात जाण्यास मनाई करण्यात आली आहे. या घटनेमुळे औद्योगिक वसाहतींतील अग्निसुरक्षा उपाययोजनांबाबत गंभीर प्रश्न उपस्थित झाले आहेत
