अंधश्रद्धा, गुप्तधन आणि आघोरी शक्तींच्या नावाखाली सुरू असलेल्या फसवणुकीचा आणखी एक धक्कादायक प्रकार अहिल्यानगर शहरात उघडकीस आला आहे. “तुमच्या घराखाली सोने आणि गुप्तधन दडलं आहे,” अशी बतावणी करत स्वतःला आघोरी बाबा म्हणवणाऱ्या एका व्यक्तीने कुटुंबाकडून तब्बल ५० हजार रुपये उकळल्याचा आरोप समोर आला आहे. एवढ्यावरच न थांबता संबंधित कुटुंबाला स्वतःचे घर पाडायला लावून मध्यरात्री मानवी खोपडी, हाडे आणि मंत्रतंत्राचा थरार माजवत जागेवर कब्जा करण्याचाही प्रयत्न झाल्याने शहरात खळबळ उडाली आहे.
तोफखाना पोलीस ठाण्यात दाखल तक्रारीनुसार, सर्जेपुरा परिसरातील एका विवाहित महिलेने तिच्याच नातेवाईकावर गंभीर आरोप केले आहेत. संबंधित आरोपी परिसरात “आघोरी बाबा” म्हणून ओळखला जात असल्याचे तक्रारीत नमूद करण्यात आले आहे.
“घराखाली सोने दडलंय…” म्हणत रचला फसवणुकीचा सापळा
तक्रारदार कुटुंब आर्थिक अडचणीत असताना आरोपीने त्यांना गुप्तधनाचे आमिष दाखवल्याचा आरोप आहे. “तुमच्या घराखाली प्रचंड सोनं आणि धन दडलं आहे. माझ्याकडे आघोरी विद्या आहे. विशेष विधी करून ते बाहेर काढता येईल,” असा दावा करत आरोपीने कुटुंबाचा विश्वास संपादन केला.
यानंतर कथित पूजाविधी, साहित्य आणि मंत्रतंत्रासाठी आरोपीने ५० हजार रुपयांची मागणी केली. सोने मिळेल या आशेने कुटुंबाने रोख रक्कम दिल्याचे तक्रारीत म्हटले आहे.
स्वतःचं घर पाडलं… आणि सुरू झाला मध्यरात्रीचा काळाकुट्ट विधी
घटनेतील सर्वात धक्कादायक बाब म्हणजे आरोपीच्या सांगण्यावरून कुटुंबाने स्वतःचे घर पाडल्याचा आरोप करण्यात आला आहे. घर पाडल्यानंतर मध्यरात्री कथित आघोरी विधी सुरू करण्यात आला.
जागेवर लिंबू, भस्म, हळद-कुंकू, मानवी खोपडी आणि हाडांची मांडणी करण्यात आली. मोठमोठ्याने मंत्रोच्चार करत आरोपीने जागा खोदण्यास सांगितले. परिसरात भीतीचे वातावरण निर्माण झाले होते, असे स्थानिकांनी सांगितले.
मात्र तासन्तास चाललेल्या या कथित विधीनंतरही कोणतेही गुप्तधन सापडले नाही.
“मोठी पूजा करावी लागेल…” म्हणत पुन्हा पैशांची मागणी
गुप्तधन बाहेर आले नाही, तेव्हा आरोपीने “अजून मोठा आघोरी प्रयोग करावा लागेल,” असे सांगत पुन्हा पैशांची मागणी केल्याचा आरोप आहे. यानंतर कुटुंबाला संशय आला.
पीडितांनी ५० हजार रुपये परत मागितले असता आरोपीने “सगळे पैसे विधीच्या साहित्यावर खर्च झाले,” अशी बतावणी केल्याचे समोर आले आहे. अनेक दिवस टोलवाटोलवी केल्यानंतर आरोपीने पैसे परत देण्यास नकार दिल्याचा आरोप तक्रारीत करण्यात आला आहे.
“ही जागा आता माझीच…” म्हणत जीवघेणी धमकी?
प्रकरण आणखी गंभीर बनले ते आरोपीच्या कथित धमकीमुळे. “ही जागा आता माझी आहे. पुन्हा इथे आलात तर आघोरी प्रयोग करून संपवून टाकीन,” अशी धमकी दिल्याचा दावा तक्रारदारांनी केला आहे.
या धमकीनंतर घाबरलेल्या कुटुंबाने अखेर तोफखाना पोलीस ठाणे गाठून तक्रार दाखल केली. पोलिसांनी प्रकरणाची चौकशी सुरू केली असून, संबंधित आरोपांची पडताळणी केली जात आहे.
अंधश्रद्धेच्या नावाखाली सुरू ‘भय आणि लुटीचा’ धंदा
राज्यात अंधश्रद्धा, जादूटोणा, गुप्तधन आणि चमत्कारांच्या नावाखाली सामान्य नागरिकांची फसवणूक करणाऱ्या भोंदूंचे जाळे अजूनही सक्रिय असल्याचे या प्रकरणातून पुन्हा अधोरेखित झाले आहे. भीती, लोभ आणि अज्ञानाचा फायदा घेत आर्थिक लूट करणाऱ्यांवर कठोर कारवाईची मागणी आता नागरिकांतून जोर धरू लागली आहे.
टीप : या प्रकरणातील सर्व आरोप तक्रारदारांनी पोलिसांकडे दिलेल्या फिर्यादीवर आधारित असून, अंतिम सत्य तपासाअंती स्पष्ट होणार आहे.
