धुळे : राज्यात दिवसेंदिवस वाढणाऱ्या अपघातांच्या मालिकेत धुळे जिल्ह्यातील मुंबई-आग्रा महामार्गावर आज पहाटे अत्यंत भीषण आणि हृदयद्रावक अपघात घडला. धुळे शहराजवळील लळिंग घाट परिसरात झालेल्या तिहेरी अपघातात तब्बल ६ जणांचा मृत्यू झाला असून १५ हून अधिक प्रवासी गंभीर जखमी झाले आहेत. या घटनेमुळे संपूर्ण परिसरात भीतीचे वातावरण निर्माण झाले आहे.
प्राथमिक माहितीनुसार, घाटात मोठी वाहतूक कोंडी झाल्याने एका वाळू वाहतूक करणाऱ्या डंपर चालकाने चुकीच्या दिशेने वाहन पुढे नेण्याचा प्रयत्न केला. याचवेळी समोरून धुळ्याकडून मालेगावच्या दिशेने येणाऱ्या मालवाहू ट्रकला डंपरने समोरासमोर जोरदार धडक दिली. धडकेचा आवाज इतका प्रचंड होता की परिसरातील नागरिकही हादरले.
मदतकार्य सुरू असतानाच मृत्यूची दुसरी धडक
पहिल्या अपघातानंतर घटनास्थळी मदतकार्य सुरू असतानाच मध्य प्रदेशातून आलेली भरधाव प्रवासी ट्रॅव्हल्स बस अपघातग्रस्त वाहनांवर मागून आदळली. अचानक झालेल्या या भीषण धडकेत ट्रॅव्हल्समधील अनेक प्रवासी अडकले. बसचा पुढील भाग अक्षरशः चेंदामेंदा झाला होता.
या दुर्दैवी घटनेत ट्रॅव्हल्समधील तीन प्रवाशांसह एकूण ६ जणांचा मृत्यू झाल्याची माहिती समोर आली आहे. तर अनेक जण गंभीर जखमी असून काहींची प्रकृती चिंताजनक असल्याचे सांगण्यात येत आहे.
महामार्गावर वाहतुकीचा खोळंबा
अपघातानंतर मुंबई-आग्रा महामार्गावरील वाहतूक पूर्णपणे विस्कळीत झाली होती. घाट परिसरात वाहनांच्या लांबच लांब रांगा लागल्या होत्या. घटनेची माहिती मिळताच पोलीस, महामार्ग सुरक्षा पथक आणि रुग्णवाहिका तातडीने घटनास्थळी दाखल झाल्या.
जखमींना त्वरित जिल्हा रुग्णालयात दाखल करण्यात आले असून त्यांच्यावर उपचार सुरू आहेत. अपघातग्रस्त वाहनं बाजूला करण्यासाठी अनेक तास बचावकार्य सुरू होते.
चुकीच्या दिशेने वाहन चालविणे पुन्हा ठरले जीवघेणे
महामार्गावर चुकीच्या दिशेने वाहन चालविण्याचे प्रकार दिवसेंदिवस वाढताना दिसत आहेत. वाहतूक नियमांकडे होणारे दुर्लक्ष आणि बेदरकार वाहनचालकांमुळे निष्पाप प्रवाशांना जीव गमवावा लागत असल्याची संतप्त प्रतिक्रिया नागरिकांकडून व्यक्त केली जात आहे.
आंबेनळी घाटातही मृत्यूचा कहर
दरम्यान, रायगड जिल्ह्यातील पोलादपूरजवळील आंबेनळी घाटात रविवारी रात्री आणखी एक भीषण अपघात घडला. पर्यटकांची स्कॉर्पिओ गाडी दांभिल टोकाजवळ नियंत्रण सुटून तब्बल ८०० फूट खोल दरीत कोसळली. या दुर्घटनेत गाडीतील सर्व ८ जणांचा मृत्यू झाला.
मृत सर्वजण सातारा जिल्ह्यातील रहिवासी असल्याची प्राथमिक माहिती समोर आली आहे. वीकेंड संपवून परतत असताना घाटातील तीव्र वळणावर चालकाचे नियंत्रण सुटल्याने हा अपघात झाल्याचा अंदाज व्यक्त केला जात आहे.
रात्रभर सुरू होते बचावकार्य
घनदाट अंधार, खोल दरी आणि दुर्गम परिसरामुळे बचावकार्याला मोठ्या अडचणींचा सामना करावा लागला. प्रतापगड सर्च अँड रेस्क्यू टीम, महाबळेश्वर ट्रेकर्स, सह्याद्री ट्रेकर्स आणि सिस्केप रेस्क्यू टीम यांनी रात्रभर शोधमोहीम राबवली.
पोलीस प्रशासन आणि महसूल विभागातील वरिष्ठ अधिकाऱ्यांनी घटनास्थळी भेट देऊन परिस्थितीचा आढावा घेतला. दरम्यान, याच आंबेनळी घाटात २०१८ मध्ये कोकण कृषी विद्यापीठाच्या बसचा भीषण अपघात होऊन ३३ जणांचा मृत्यू झाला होता. त्यामुळे पुन्हा एकदा घाट रस्त्यांच्या सुरक्षेचा प्रश्न ऐरणीवर आला आहे.
“वेग, निष्काळजीपणा आणि नियमभंग… महामार्गांवर मृत्यूचे सत्र थांबणार कधी?” — असा सवाल आता सर्वसामान्य नागरिकांकडून उपस्थित केला जात आहे.
— फुले शाहू आंबेडकर वृत्तपत्र
