नाशिक | क्राईम स्पेशल प्रतिनिधी
नाशिक रोड मध्यवर्ती कारागृहातील कथित ‘ओली पार्टी’ प्रकरणाने राज्यभरात खळबळ उडाली असून, आरोपी आणि कारागृह अधिकाऱ्यांमधील कथित संबंधांवर गंभीर प्रश्न उपस्थित झाले आहेत. सोशल मीडियावर व्हायरल झालेल्या एका व्हिडीओमुळे संपूर्ण पोलीस व कारागृह प्रशासन हादरले आहे. या व्हिडीओमध्ये कारागृह विभागातील काही अधिकारी एका सराईत गुन्हेगारासोबत पार्टी करताना दिसत असल्याचा दावा केला जात आहे.
या प्रकरणातील सर्वात धक्कादायक बाब म्हणजे पार्टीत दिसणारा गौरव मिश्रा हा स्वतःला आयपीएस अधिकारी म्हणून सादर करत असल्याचा आरोप आहे. सूत्रांच्या माहितीनुसार, तो अनेक दिवसांपासून लाल दिव्याच्या वाहनातून फिरत होता. काही ठिकाणी त्याच्यासोबत पोलीस एस्कॉर्टही दिसल्याने त्याने प्रभावशाली अधिकाऱ्यांशी जवळीक निर्माण केल्याची चर्चा रंगली होती.
तोतया IPSचा थाट, अधिकाऱ्यांशी सलगी?
गौरव मिश्रा याच्यावर यापूर्वीही अनेकांना फसवणूक करून गंडा घातल्याचे आरोप आहेत. तो स्वतःला वरिष्ठ आयपीएस अधिकारी म्हणून ओळख करून देत असल्याची माहिती समोर आली आहे. शहरातील काही बड्या अधिकाऱ्यांसोबत त्याचे फोटो आणि व्हिडीओ व्हायरल झाल्याने प्रकरण आणखी गडद झाले आहे.
सूत्रांच्या दाव्यानुसार, त्याने पोलीस वर्तुळात प्रभाव निर्माण करण्यासाठी मोठा डाव रचला होता. काही बदल्या आणि प्रशासकीय हालचालींमध्येही त्याची पडद्यामागून भूमिका असल्याची चर्चा आहे. मात्र, याबाबत कोणतीही अधिकृत पुष्टी करण्यात आलेली नाही.
आरोपींसाठी ‘विशेष मदत’ मिळवण्याचा कट?
या प्रकरणात पीएल ग्रुप टोळीचे नावही समोर येत आहे. प्रकाश लोंढे आणि भूषण लोंढे या आरोपींना कारागृहात कथित मदत मिळावी, यासाठीच ही पार्टी आयोजित करण्यात आली असावी, असा संशय व्यक्त केला जात आहे.
कारागृहातील काही अधिकाऱ्यांची आरोपींसोबत वाढलेली जवळीक पाहता, तुरुंगातील अंतर्गत व्यवहारांवर प्रश्नचिन्ह निर्माण झाले आहे. कायद्याचे रक्षण करणारेच जर संशयाच्या भोवऱ्यात सापडले, तर सामान्य नागरिकांनी विश्वास ठेवायचा कुणावर? असा सवाल आता उपस्थित केला जात आहे.
व्हायरल व्हिडीओने उडवली झोप
सोशल मीडियावर व्हायरल झालेल्या व्हिडीओमध्ये कथितरीत्या कारागृह अधिकारी हिरालाल भामरे, अशोक मलवाड आणि जगदीश ढुमने दिसत असल्याचा दावा केला जात आहे. आरोपींसोबत कथित मद्यपान आणि मैफिलीमुळे प्रशासनाची प्रतिमा मलिन झाली आहे.
व्हिडीओ समोर आल्यानंतर विभागीय स्तरावर हालचालींना वेग आला असून, वरिष्ठ अधिकाऱ्यांकडून प्राथमिक माहिती गोळा केली जात असल्याचे समजते. या प्रकरणाची सखोल चौकशी होण्याची शक्यता असून, दोषी आढळल्यास कठोर कारवाई केली जाऊ शकते.
कारागृह व्यवस्थेवर पुन्हा प्रश्नचिन्ह
राज्यातील कारागृह व्यवस्थेबाबत यापूर्वीही अनेकदा गंभीर आरोप झाले आहेत. मात्र, आरोपी आणि अधिकाऱ्यांमधील कथित ‘मैत्री’ उघड करणारा हा प्रकार अत्यंत धक्कादायक मानला जात आहे.
कायद्याच्या चौकटीत राहून चौकशी होणे आवश्यक असले, तरी या प्रकरणाने सर्वसामान्यांच्या मनात संतापाची भावना निर्माण केली आहे. “तुरुंगात शिक्षा भोगणाऱ्यांना मदत मिळतेय का?” हा प्रश्न आता चर्चेचा केंद्रबिंदू ठरत आहे.
अधिकृत चौकशीची प्रतीक्षा
दरम्यान, संबंधित अधिकाऱ्यांकडून अद्याप अधिकृत भूमिका स्पष्ट करण्यात आलेली नाही. व्हायरल व्हिडीओची सत्यता, त्यातील व्यक्तींची ओळख आणि पार्टीमागील नेमकं कारण याबाबत अधिकृत चौकशी अहवालानंतरच स्पष्ट चित्र समोर येणार आहे.
तथापि, या प्रकरणाने नाशिकच्या पोलीस आणि कारागृह प्रशासनात एकच खळबळ उडवली असून, पुढील काही दिवसांत आणखी धक्कादायक खुलासे होण्याची शक्यता वर्तवली जात आहे.
