भुसावळ | क्राईम न्यूज प्रतिनिधी
सरकारी कार्यालयात परवाना मंजुरीसाठी कथितपणे ‘टेबलाखालचा व्यवहार’ सुरू असल्याचा धक्कादायक प्रकार उघडकीस आला असून, सावकारी परवाना मिळवून देण्यासाठी ३० हजार रुपयांची लाच स्वीकारताना सहायक सहकार अधिकारी आणि दोन लेखापरीक्षकांना जळगाव लाचलुचपत प्रतिबंधक विभागाने (एसीबी) रंगेहात पकडल्याने भुसावळसह संपूर्ण जिल्ह्यात मोठी खळबळ उडाली आहे.
मिळालेल्या माहितीनुसार, भुसावळ येथील सहायक निबंधक कार्यालयातील सहायक सहकार अधिकारी विनय गरुड (रा. धुळे) तसेच लेखापरीक्षक सुरेश विसपुते (वय ६२) आणि हेमंत प्रकाश काळे (वय ४९) यांनी एका तक्रारदाराकडे सावकारी परवाना मंजूर करून देण्यासाठी तब्बल ३० हजार रुपयांची लाच मागितल्याचा आरोप आहे.
या मागणीमुळे त्रस्त झालेल्या तक्रारदाराने थेट जळगाव लाचलुचपत प्रतिबंधक विभागाकडे धाव घेत तक्रार दाखल केली. एसीबीने तक्रारीची गोपनीय पडताळणी केल्यानंतर आरोपांमध्ये तथ्य आढळून आले. त्यानंतर अधिकाऱ्यांनी सोमवारी सकाळपासून भुसावळ परिसरात सापळा रचून संपूर्ण हालचालींवर बारकाईने नजर ठेवली.
नाहाटा चौफुलीवर ‘डील’ अन् एसीबीचा धाडसी सापळा!
सूत्रांच्या माहितीनुसार, तक्रारदाराला नाहाटा चौफुली परिसरात बोलावण्यात आले. येथे कथित लाचेची रक्कम स्वीकारण्याचा व्यवहार सुरू असतानाच एसीबीच्या पथकाने विजेच्या वेगाने कारवाई करत संशयितांना जाळ्यात अडकवले. ३० हजार रुपयांची रक्कम स्वीकारताना कारवाई झाल्याने उपस्थितांमध्ये एकच खळबळ उडाली.
कार्यालयीन वर्तुळात चर्चांना उधाण
ही कारवाई समोर आल्यानंतर सहायक निबंधक कार्यालयातील कामकाज, परवाना प्रक्रियेतील कथित गैरप्रकार आणि आर्थिक व्यवहारांबाबत विविध चर्चा रंगू लागल्या आहेत. सरकारी यंत्रणांमधील पारदर्शकतेवर प्रश्नचिन्ह निर्माण करणारी ही घटना मानली जात आहे.
दोन ताब्यात, तिसऱ्याच्या शोधासाठी पथक रवाना
कारवाईनंतर दोन संशयितांना ताब्यात घेण्यात आले असून, तिसऱ्या संशयिताला ताब्यात घेण्यासाठी एसीबीचे पथक वरिष्ठांच्या आदेशानुसार धुळे येथे रवाना झाल्याची माहिती सूत्रांनी दिली. संबंधित प्रकरणी पुढील कायदेशीर प्रक्रिया सुरू असून अधिक तपास करण्यात येत आहे.
भ्रष्टाचाराविरोधात एसीबीचा पुन्हा एकदा दणका
लाचखोरीच्या प्रकरणांवर अंकुश आणण्यासाठी एसीबी सातत्याने कारवाया करत असताना भुसावळमधील ही कारवाई विशेष चर्चेचा विषय ठरली आहे. परवाना मंजुरीसारख्या प्रशासकीय प्रक्रियेत कथित लाचेची मागणी झाल्याचा आरोप समोर आल्याने नागरिकांमध्ये संतापाची भावना व्यक्त होत आहे.
(टीप : संबंधित व्यक्तींवर गुन्हा दाखल करण्याची व तपासाची प्रक्रिया सुरू असून न्यायालयीन निर्णय येणे बाकी आहे.)
