नागपूर | प्रतिनिधी
नागपूर शहराला हादरवून सोडणारी एक धक्कादायक घटना समोर आली असून, एका विवाहितेला गुंगीचे औषध देऊन तिच्यावर अत्याचार केल्याचा, आक्षेपार्ह व्हिडिओ तयार करून ब्लॅकमेल केल्याचा, धर्मांतरासाठी दबाव टाकल्याचा तसेच लाखो रुपयांची उकळपट्टी केल्याचा गंभीर आरोप वर्गमित्रासह तिघांवर करण्यात आला आहे. या प्रकरणामुळे शहरात मोठी खळबळ उडाली असून पोलिसांनी दोन आरोपींना अटक केली आहे, तर कथित मौलवी अद्याप फरार असल्याने त्याचा शोध सुरू आहे.
पोलिसांनी दिलेल्या माहितीनुसार, अय्याज ताज मदारे (वय २६, रा. ब्राह्मणी फाटा, कळमेश्वर) आणि आमीन शेख (वय ३०, रा. कळमेश्वर) यांना अटक करण्यात आली आहे. तर हजरत मौलाना (रा. तामिया, छिंदवाडा) हा आरोपी फरार असून त्याचा शोध घेण्यासाठी पोलिसांचे विशेष पथक कामाला लागले आहे.
प्लॉट खरेदीच्या बहाण्याने वाढवली ओळख
तक्रारीनुसार, पीडित विवाहितेचा पती भारतीय वायुसेनेत कार्यरत असून बाहेरगावी नोकरीवर आहे. पीडिता प्रॉपर्टी डिलिंगचे काम करत असताना तिचा वर्गमित्र अय्याज याने प्लॉट खरेदीच्या बहाण्याने तिच्याशी संपर्क साधला. ओळखीचे रूपांतर मैत्रीत झाले आणि त्यानंतर आरोपीने विश्वास संपादन करून कथित कट रचल्याचा आरोप आहे.
ज्युसमध्ये गुंगीचे औषध; बेशुद्ध अवस्थेचा गैरफायदा?
तक्रारीनुसार, गेल्या वर्षी फेब्रुवारीमध्ये आरोपीने पीडितेला वर्धा मार्गावरील एका हॉटेलमध्ये बोलावले. तेथे ज्युसमध्ये गुंगीचे औषध मिसळून तिला बेशुद्ध केल्याचा आरोप करण्यात आला आहे. त्यानंतर तिच्यावर अत्याचार करून आक्षेपार्ह फोटो व व्हिडिओ तयार करण्यात आल्याचे तक्रारीत नमूद आहे.
याच व्हिडिओंच्या आधारे आरोपीने पीडितेला सतत धमकावण्यास सुरुवात केली. "व्हिडिओ सोशल मीडियावर व्हायरल करीन" अशी भीती दाखवून तिचे मानसिक, शारीरिक आणि आर्थिक शोषण करण्यात आल्याचा आरोप आहे.
धर्मांतरासाठी दबाव; निर्जनस्थळी नेल्याचा आरोप
तक्रारीनुसार, आरोपी अय्याज हा पीडितेवर सातत्याने धर्मांतरासाठी दबाव टाकत होता. मात्र ती नकार देत होती. ३१ मे रोजी फिरायला जाण्याच्या बहाण्याने तिला कारमध्ये बसवून कळमेश्वर परिसरात नेण्यात आल्याचे तक्रारीत म्हटले आहे.
तेथे आमीन शेख आणि कथित मौलवी यांच्यासोबत तिची भेट घालून देण्यात आली. त्यानंतर तिला एका अंधाऱ्या ठिकाणी नेण्यात आले. तेथे काही धार्मिक विधी केल्याचा तसेच तिच्याकडून काही शब्द उच्चारून घेत धर्मपरिवर्तन झाल्याचे सांगण्यात आल्याचा गंभीर आरोप तक्रारीत करण्यात आला आहे.
अत्याचारांची मालिका; अखेर पतीसमोर उघड झाले सत्य
पीडितेच्या तक्रारीनुसार, या घटनेनंतरही आरोपीकडून अत्याचार आणि धमक्यांची मालिका सुरूच राहिली. अखेर त्रास असह्य झाल्यानंतर पीडितेने आपल्या पतीला संपूर्ण प्रकार सांगितला. त्यानंतर दोघांनी सोनेगाव पोलिस ठाणे गाठून तक्रार दाखल केली.
तक्रारीच्या आधारे पोलिसांनी बलात्कार, धमकी, आर्थिक फसवणूक, धर्मांतराचा प्रयत्न तसेच लागू असलेल्या कायद्यांअंतर्गत गुन्हा दाखल केला. अटक केलेल्या दोन्ही आरोपींना न्यायालयात हजर करण्यात आले असता न्यायालयाने त्यांना पाच दिवसांची पोलिस कोठडी सुनावली.
व्हिडिओ व्हायरल करण्याची धमकी; ३ लाखांहून अधिक रकमेची उकळपट्टी?
या प्रकरणातील आणखी धक्कादायक बाब म्हणजे, आरोपीने कथित आक्षेपार्ह व्हिडिओ व्हायरल करण्याची धमकी देत पीडितेकडून तब्बल ३ लाख ९ हजार रुपये उकळल्याचा आरोपही तक्रारीत करण्यात आला आहे. या आर्थिक व्यवहारांचा तपास पोलिसांकडून सुरू असून डिजिटल पुरावे आणि आर्थिक व्यवहारांची छाननी करण्यात येत आहे.
फरार मौलवीच्या शोधासाठी पोलिसांची धावपळ
प्रकरणातील तिसरा आरोपी अद्याप फरार असून त्याच्या अटकेसाठी पोलिसांनी शोधमोहीम तीव्र केली आहे. या प्रकरणात आणखी काही धक्कादायक तपशील समोर येण्याची शक्यता तपास यंत्रणांनी व्यक्त केली आहे.
(सूचना : या प्रकरणातील सर्व आरोप हे तक्रारदाराने केलेल्या तक्रारीवर आधारित असून त्यांचा तपास सुरू आहे. न्यायालयीन प्रक्रियेनंतरच आरोपींची दोषी अथवा निर्दोषता निश्चित होईल.)
