शिंदखेडा तालुक्यातील देवाचे विखरण येथील विनोद हिम्मतसिंग राजपूत हे कामानिमित्त गुजरातमधील सुरत येथे वास्तव्यास होते. दोन दिवसांपूर्वी सुरत येथून ते आपल्या गावी विखरण येथे आले होते. शालकाच्या साखरपुड्यासाठी आज ते त्यांचा लहान मुलगा कृष्णा विनोद राजपूत याच्या सोबत विखरण येथून चिमठाणे येथे दुचाकीने जात होते. भडणे फाट्याजवळ त्यांची दुचाकी वाळू वाहतूक करणाऱ्या एका भरधाव डंपरला धडकली. त्यात विनोद राजपूत यांचा जागीच मृत्यू झाला, तर त्यांचा मुलगा कृष्णा हा गंभीर जखमी झाला. उपचारासाठी त्याला धुळे येथे घेऊन जात असताना त्याचा मृत्यू झाला. या अपघातात विनोद राजपूत यांचे शीर आणि धड वेगळे झाले होते. अपघातग्रस्त डंपर शिंदखेडा पोलिसांनी ताब्यात घेतला आहे.
