भाजपच्या भोपाळमधील खासदार साध्वी प्रज्ञासिंह ठाकूर यांच्यासह अनेक आरोपींविरोधात विशेष तपास संस्थेकडून (एनआयए) चालवण्यात येणाऱ्या या खटल्यात सरकारी पक्षाकडून आत्तापर्यंत २३२ साक्षीदार तपासण्यात आले आहेत. त्यापैकी १८ साक्षीदारांनी तपास संस्थांसमोर नोंदवलेल्या जबाबाचे खंडन केले. त्यामुळे न्यायालयाने त्यांना फितूर घोषित केले. सोमवारच्या सुनावणीत न्या. पी. आर. सित्रे यांच्यासमोर २३२वा साक्षीदार असलेल्या, मध्य प्रदेशमधील पंचमढी येथील हॉटेल मालकाची साक्ष झाली.
लेफ्टनंट कर्नल प्रसाद पुरोहित (खटल्यातील आरोपी) याच्या सांगण्यावरून १६ ते २१ ऑक्टोबर २००८ या कालावधीत मी आर्ट ऑफ लिव्हिंग नावाचे एक शिबिर आयोजित केले होते. पुरोहितने मला एअर रायफलची व्यवस्था करायला सांगितली होती. परंतु, मला ती करता आली नाही. या शिबिरात आर्ट ऑफ लिव्हिंगच्या नावाखाली काही वेगळेच सुरू होते. लाठी चालवण्याच्या एका सत्रात सुधाकर चतुर्वेदी (आरोपी) जखमीही झाला होता. शिबिरासाठी ७९ हजार १५० रुपये खर्च आला आणि त्यासाठी काही पैसे अजय राहिरकर (आरोपी) याने दिले होते,' असे या हॉटेलमालकाने महाराष्ट्र एटीएस व एनआयएला दिलेल्या जबाबात म्हटले होते. मात्र, आपल्याला काही आठवत नाही, असे त्याने सोमवारी न्यायालयातील साक्षीत म्हटले. त्याचबरोबर सुनावणीच्या वेळी न्यायालयात उपस्थित असलेल्या पुरोहितला ओळखत नसल्याचेही त्याने सांगितले. त्यामुळे न्यायाधीशांनी त्याला फितूर घोषित केले
