कोट्यवधी रुपयांच्या जागेचे मालक ,अशी खोटी जाहिरात करून शेकडो गुंतवणूकदारांची फसवणूक

साडेचार लाख गुंतवा आणि कोकणात कोट्यवधी रुपयांच्या जागेचे मालक व्हा' अशी जाहिरात करून शेकडो गुंतवणूकदारांची फसवणूक  करण्यात आल्याचे समोर आले आहे. याप्रकरणी गुंतवणूकदारांच्या तक्रारीवरून माटुंगा पोलिसांनी श्री महाराज ग्रुप ऑफ कंपनीजचे संचालक आणि अधिकारी यांच्याविरोधात गुन्हा दाखल केला. संचालकांपैकी एक असलेले प्रवीर पारकर यांना अटक करण्यात आली असून आतापर्यंत सुमारे दोन कोटी रुपयांची फसवणूक केल्याचे समोर आले आहे. श्री महाराज ग्रुप ऑफ कंपनीजचे दादर पूर्वेला कार्यालय आहे. या कंपनीच्या वतीने कोकणातील वैभववाडी तालुक्याच्या कुर्ली घोणसारी या गावामध्ये तीन गुंठे जमिनीवर वेगवेगळ्या प्रकारची घरे बांधून ४० गुंठे शेतजमिनीवर सामायिक शेतीद्वारे कोकणातील विविध फळझाडांचे रोपण करण्यात येणार आहे. या योजनेत साडेचार लाख रुपये गुंतविल्यास तीन गुंठे जमीन मालकीची असेल, तसेच सामायिक शेतीमधून येणारे उत्पन्नही विभागण्यात येईल. विशेष म्हणजे ४० गुंठे जमीनही सर्व गुंतवणूकदारांच्या नावे केली जाईल, अशी जाहिरात प्रवीर पारकर, त्यांच्या पत्नी गौरी पारकर आणि कंपनीच्या इतर अधिकाऱ्यांनी केली. यामध्ये मुंबईसह वेगवेगळ्या भागांतील लोकांनी पैसे गुंतविले. साडेचार लाख रुपये गुंतवून अनेक वर्षे उलटली, परतावा, जमीन किंवा अन्य काहीच न मिळाल्याने गुंतवणूकदारांनी माटुंगा पोलिस ठाण्यात तक्रार केली. माटुंगा पोलिसांनी या तक्रारीवरून कंपनीवर गुन्हा दाखल करून संचालक प्रवीर पारकर यांना अटक केली. फसवणूक झाली असल्यास गुंतवणूकदारांनी संपर्क साधावा, असे आवाहन पोलिसांनी केले.