6 मे रोजी बीडच्या शिरूर तालुक्यातील आनंदगावात एका 65 वर्षीय वृद्ध व्यक्तीची हत्या करण्यात आली होती.
या दोन्ही ठिकाणी आढळून आलेल्या चिठ्ठीत आरोपीने दुसऱ्याच इसमांची नावे टाकली होती. त्यांना अटक न केल्यास खुनाचे सत्र पुढे असंच सुरू राहील, म्हणत पोलिसांना आव्हान दिले होते. वीस दिवस पोलिसांना चकवा दिल्यानंतर अखेर पोलिसांनी या आरोपीला वर्ध्यातून अटक केलीय.
सरकल्या उर्फ भगवान पुस्तक्या चव्हाण (वय 30 वर्ष, रा. तागडगाव ता. शिरूर कासार जि. बीड) असं पकडण्यात आलेल्या आरोपीचे नाव आहे. ऊसतोड कामगार असणाऱ्या आरोपी सरकल्याचं गेल्या काही वर्षांपूर्वी लग्न झालं. मात्र काही कारणामुळे आरोपी सरकल्या आणि त्याच्या बायकोच्या भावांमध्ये वाद झाला. यादरम्यान बायको देखील माहेरी होती.
या वादामध्ये आरोपी सरकल्याला बायकोच्या 5 भावांनी मारहाण केली होती. याचा राग मनात धरून आणि बायकोच्या भावांना अडकवून अद्दल घडवण्यासाठी, आरोपी सरकल्याने नामी शक्कल लढवली आणि निरपराध असणाऱ्या वृद्ध व्यक्तीवर हल्ला करत त्याचा खून केला. यानंतर त्याने घटनास्थळी बायकोच्या भावंडांची नावे टाकून चिठ्ठी देखील सोडली.
पोलिसांनी आतापर्यंत जवळपास 20 ते 25 संशयितांना ताब्यात घेत चौकशी केली होती. अखेर पोलिसांनी 20 दिवसाच्या अथक परिश्रमानंतर आरोपी सरकल्याला वर्धा जिल्ह्यातून अटक केलीय. दरम्यान आरोपी हा अशिक्षित असून त्याला लिहिता वाचता येत नाही. त्यामुळे या खुनामागे नेमकं कोणा कोणाचा हात आहे ? याचा तपास आता बीड पोलिस करत आहेत.
