संशयीत आरोपी महिला ही मुळची खारघरची असून ती तिचे पती सुरज चव्हाण यांच्या बरोबर राहते. तर, तिचे माहेर पुण्यातच असून तिची बहीणदेखील पुण्यातच राहण्यास आहे. पुण्यातून सोने घेऊन ते पुढे जास्त किंमतीला देण्याचे काम ती करत करत होती.
पोलिसांनी दिलेल्या माहिती नुसार, माधवी ही पोपटाला जेव्हर्ल्सची रेग्युलर कस्टमर आहे. ती नेहमी कधी एक किलो, कधी अर्धा किलो, अशा वजनाचे सोने खरेदी करत असायची. मात्र, बुधवारी दुपारी तीन वाजण्याच्या सुमारास माधवी रविवार पेठेतील पोपटलाल गोल्डच्या दुकानात आली. बुधवारी तिने गरोदर असल्याचे सांगून वारंवार येण्यास जमणार नसल्याचे कारण देत तब्बल ५ किलो सोन्याची बिस्कीटे खरेदी केली. तिने काही रक्कम कॅश आणि काही रक्कम आरटीजीएस करणार असल्याचे सांगितले.
माझ्यासोबत तुमचा एक मुलगा पाठवा, मी गरोदर असल्यामुळे मला परत येता येणार नाही, असे दुकानदाराला सांगितले. त्यानंतर दुकानदाराने तिच्या सोबत एक मुलगा पाठवला. मात्र सोन्याची बिस्कीटे खरेदी केल्यानंतर गाडीत ठेवण्यात आलेली कॅश घेऊन येण्याच्या बहाण्याने ती दुकानाच्या बाहेर पडली. त्याच्या सोबत दुकानातील एक मुलगा होता. परंतु, तिथे तिने त्या मुलाला हुलकावणी देऊन ती फरार झाली.
त्यानंतर तिने तिचा मोबाईल फोनदेखील बंद केला. या प्रकरणी रात्री उशिरा फरासखाना पोलिस ठाण्यात गुन्हा दाखल करण्यात आल्यानंतर पोलिसांनी तांत्रिक विश्लेषणावरून तिचा माग काढला. दुकानाचे सीसीटीव्ही फुटेज तपासून त्या आधारे तिचा माग काढला असता ती खारघर येथे पोहोचल्याचे तपासात निष्पन्न झाले.
फरासखाना पोलिसांचे पथक तिच्या अटकेसाठी रवाना झाले. तिला खारघर येथील राहत्या घरातून सकाळी पावणे नऊच्या सुमारास ताब्यात घेण्यात आले. पोलिस उपायुक्त प्रियंका नारनवरे, वरिष्ठ निरीक्षक राजेद्र लांडगे, सहायक पोलिस निरीक्षक संतोष शिंदे यांच्या पथकाने ही कामगिरी केली.
