अमरावती जिल्ह्यातील तिवसा तालुक्यातील कौंडण्यपूर परिसरातील संतापजनक प्रकार समोर आला आहे. सदर व्हायरल व्हिडीओ हा कौंडण्यपूर-अंजनसिंगी रोडवरील बार जवळील असल्याची शक्यता वर्तवण्यात येत आहे. आर्वी तालुक्यातील देऊरवाडा येथील पित्याचा हा संतापजनक कारनामा आहे. लहान मुलांना दारू पाजतानाचा व्हिडीओ सोशल मीडियावर प्रचंड व्हायरल झाला आहे. व्हिडीओ व्हायरल झाल्यानंतर नेटकऱ्यांकडून संतप्त प्रतिक्रिया उमटत आहेत. नेटकऱ्यांकडून या पित्यावर कारवाई करण्याची मागणी होत आहे. या पित्यावर पोलीस कारवाई करणार का, याकडे साऱ्यांचे लक्ष लागले आहे.
दरम्यान,या व्हिडीओवर सामाजिक कार्यकर्ते हेरंब कुलकर्णी यांनी भाष्य केलं आहे. कुलकर्णी म्हणाले,'ज्या अमरावती जिल्ह्यात संत गाडगेबाबा यांनी आयुष्यभर व्यसनमुक्तीसाठी प्रबोधन केलं. या जिल्ह्यातून हा व्हिडीओ समोर यावा, हे अत्यंत खेदजनक आहे. या मुलांना गंमत म्हणून दारू पाजत असतील, तर पुढे त्या मुलांना व्यसन लागू शकतं. त्यामुळे पुढे आयुष्यभर त्यांना दारूचं व्यसन लागू शकतं. याची किंचित देखील जाणीव त्या पालकाला दिसत नाही.
पालकत्व कसं नसावं हा सांगणारा हा व्हिडीओ आहे. सोशल मीडियाच्या काळात लाईक्स, कमेंट्ससाठी पुढील परिणामाचाही विचार हा व्यक्ती करत नाही. हे शहरीभागातही वेगळ्या माध्यमातून घडतं. शहरात पालक मुलांसमोर व्यसन करतात, सरकार घरपोच दारू पोहोचवण्याची सोय करतं. या साऱ्यामुळे राज्यात व्यसन करणाऱ्यांचं वय हे हळूहळू कमी होत चाललं आहे. त्याला पालकांचा असा दृष्टीकोन जबाबदार आहे'.
