कल्याण पूर्व भागात राहत असलेल्या २५ वर्षाच्या सॉफ्टवेअर इंजिनिअरची दोन महिलांनी ऑनलाईन नोकरी देण्याचे आमिष दाखवत फसवणूक केल्याची घटना समोर आली आहे. ऑनलाईन नोकरी देण्याचे आमिष दाखवून गेल्या दहा दिवसाच्या कालावधीत इंजिनिअरची ४० लाख ४० हजार ३०० रुपयांची फसवणूक केल्याचा प्रकार उघडकीस आला आहे. कोळसेवाडी पोलिसांनी माहिती तंत्रज्ञान कायद्याने या प्रकरणी गु्न्हा दाखल केला आणि तपास सुरू केला आहे.
याबाबत पोलिसांनी सांगितले की, कल्याणमधील प्रतिक नावाचा तरुण हा सॉफ्टवेअर इंजिनिअर आहे. साधारण पंधरा दिवसापूर्वी प्रतिक घरी असताना, प्रिया आणि अविका या दोन महिलांनी मोबाईलच्या माध्यमातून त्याच्याशी संपर्क साधला. प्रतिकला बोलण्यात गुंतवून ठेवून ऑनलाईन माध्यमातून अर्धवेळ नोकरी मिळवून देण्याचे आमिष त्याला दाखवले. घरबसल्या अर्धवेळ नोकरी मिळते म्हणून प्रतिकने या महिलांच्या संपर्काला प्रतिसाद दिला.
आरोपी महिलांनी लिंक दिली आणि पैसे घेतले....
आरोपी महिलांनी प्रतिकला व्हॉट्सअॅप आणि टेलिग्रामच्या माध्यमातून संपर्क करून त्यांना एक लिंक पाठवली. या लिंकच्या माध्यमातून एक गुंतवणुकीचे साधन पाठवून प्रतिकला टप्प्याने गुंतवणूक करण्यास भाग पाडले. गुंतवणूक साधनाचा गुणांक वाढेल त्याप्रमाणे तुम्हाला अधिकचा नफा मिळेल, असे आश्वासन आरोपी प्रिया, अविका यांनी प्रतिकला दिले. अशाप्रकारे गोडबोलून या भामट्या महिलांनी प्रतिकच्या कल्याण पूर्वेतील सूचकनाका येथील एचडीएफसी बँकेतून स्वतःच्या संशयित बँक खात्यात ४० लाख ४० हजार ३०० रुपये गुंतवणूक वळते करून घेतले.
कोळसेवाडी पोलीस ठाण्यात गुन्हा दाखल....
गुंतवणुकीवर तातडीने नफा मिळत असल्याने प्रतिक त्या नफ्याची मागणी आरोपी महिलांकडे करू लागला. परंतु, त्या महिलांनी प्रतिकच्या संपर्काला प्रतिसाद देणे बंद केले. आपणास अर्धवेळ नोकरी नाहीच पण गुंतवणूक केलेल्या रक्कमेवर अधिकचा परताना मिळत नाही. गुंतवणूक केलेली मूळ रक्कम आरोपी महिला परत करत नाहीत. हे उशिरा लक्षात आल्यावर प्रतिकला आपली फसवणूक या महिलांनी केले असल्याचे निदर्शनास आले. कोळसेवाडी पोलिसांनी माहिती तंत्रज्ञान कायद्याने या प्रकरणी गु्न्हा दाखल केला आणि तपास सुरू केला आहे.
