देशाची आर्थिक राजधानी असलेल्या मुंबईला ‘उडती मुंबई’ बनवण्याचा कट आखला जात होता का? असा संतापजनक सवाल उपस्थित करणारी धक्कादायक कारवाई मुंबई अमली पदार्थ विरोधी पथकाने (ANC) केली आहे. अग्रिपाडा परिसरात सुरू असलेल्या कथित अवैध ड्रग्ज उत्पादन केंद्रावर धाड टाकत पोलिसांनी तब्बल ५१ कोटी रुपयांचा एमडी ड्रग्ज साठा, द्रव एमडी, शस्त्रे आणि जिवंत काडतुसे जप्त केली आहेत. या कारवाईनंतर मुंबईतील ड्रग्ज माफियांच्या काळ्या साम्राज्याचा आणखी एक चेहरा समोर आला आहे.
मुंबई पोलिसांच्या अमली पदार्थ विरोधी पथकाला काही दिवसांपासून संशयास्पद हालचालींची माहिती मिळत होती. त्यानुसार विशेष पथकाने गुप्त तपास सुरू केला. अखेर अग्रिपाडा परिसरातील एका ठिकाणी छापा टाकत मोठे ड्रग्ज रॅकेट उद्ध्वस्त करण्यात आले. पोलिसांनी घटनास्थळी प्रवेश करताच आत सुरू असलेला कथित ड्रग्ज उत्पादनाचा धक्कादायक प्रकार उघड झाला.
१४ किलो एमडी, द्रव ड्रग्ज आणि रासायनिक साहित्य जप्त
तपासादरम्यान पोलिसांना मोठ्या प्रमाणावर एमडी ड्रग्ज, द्रव स्वरूपातील अमली पदार्थ, रासायनिक साहित्य आणि ड्रग्ज तयार करण्यासाठी लागणारी उपकरणे आढळून आली. अधिकाऱ्यांच्या माहितीनुसार, सुमारे १४ किलो एमडी आणि द्रव एमडी जप्त करण्यात आले असून त्याची अंदाजे बाजार किंमत ५१ कोटी रुपये इतकी असल्याचे सांगितले जात आहे.
या कारवाईमुळे मुंबईत मोठ्या प्रमाणावर ड्रग्ज पुरवठा करण्याची तयारी सुरू असल्याचा संशय व्यक्त केला जात आहे. विशेष म्हणजे, या संपूर्ण रॅकेटमागे संघटित टोळी सक्रिय असल्याची शक्यता पोलिसांकडून वर्तवली जात आहे.
ड्रग्जसोबत पिस्तूल आणि १९ जिवंत काडतुसे
छाप्यादरम्यान पोलिसांच्या हाती केवळ अमली पदार्थच नाही तर एक पिस्तूल आणि १९ जिवंत काडतुसेही लागली. त्यामुळे या प्रकरणाचे गांभीर्य आणखी वाढले आहे. ड्रग्ज व्यवहारांसोबत शस्त्रसाठा आढळल्याने आरोपींचे संबंध आंतरराज्य किंवा संघटित गुन्हेगारी टोळ्यांशी असू शकतात, अशी शक्यता तपास यंत्रणांकडून व्यक्त होत आहे.
बांगलादेशी महिलेचा संशयित कनेक्शन?
या प्रकरणात अटक करण्यात आलेल्या आरोपींपैकी एका महिलेने पश्चिम बंगालचा पत्ता वापरल्याची माहिती समोर आली आहे. मात्र, प्राथमिक तपासात ती महिला बांगलादेशी असल्याचा संशय पोलिसांनी व्यक्त केला आहे. संबंधित कागदपत्रांची सखोल चौकशी सुरू असून या नेटवर्कचे आंतरराष्ट्रीय धागेदोरे तपासले जात आहेत.
तिघांना अटक; पोलीस कोठडी
या कारवाईत मोहम्मद शौफ शौकत अली मन्सूरी (वय ३३), सुफियान सलीम मन्सूरी (वय २९) आणि मामुनी सुनील सरकार (वय २३) यांना अटक करण्यात आली आहे. सर्व आरोपींना न्यायालयात हजर करण्यात आले असून न्यायालयाने त्यांना ३ तारखेपर्यंत पोलीस कोठडी सुनावली आहे.
मुंबई ANC चे डीसीपी नवनाथ ढवळे यांनी सांगितले की, या संपूर्ण रॅकेटचा तपास अत्यंत गंभीरपणे सुरू असून आणखी काही धक्कादायक खुलासे समोर येण्याची शक्यता आहे.
मुंबईत ड्रग्ज माफियांचा विळखा?
मुंबईसारख्या महानगरात एवढ्या मोठ्या प्रमाणावर ड्रग्ज उत्पादन होत असल्याचे उघड झाल्याने नागरिकांमध्ये चिंता व्यक्त होत आहे. तरुण पिढीला नशेच्या विळख्यात ओढण्यासाठी शहरात मोठे जाळे कार्यरत असल्याचा संशय व्यक्त केला जात आहे. पोलिसांकडून आता या प्रकरणातील आर्थिक व्यवहार, संपर्क आणि इतर साथीदारांचा शोध घेतला जात आहे.
(टीप : संबंधित आरोपींविरोधातील आरोप प्राथमिक तपासावर आधारित असून न्यायालयीन निर्णय येणे बाकी आहे.)
