अनुप अग्रवाल यांच्या मध्यस्थीमुळे धुळे शहरात निर्माण झालेला तणाव अखेर नियंत्रणात आला; मात्र रेल्वे स्टेशन परिसरात घडलेल्या या थरारक घटनेने संपूर्ण शहर हादरून गेले आहे. गायींच्या कथित तस्करीच्या संशयावरून संतप्त नागरिकांनी दोन संशयितांना वाहनातून बाहेर खेचत बेदम मारहाण केली, तर संबंधित चारचाकी वाहनाची अक्षरशः चिरफाड करण्यात आली. काही काळ परिसरात भीती, संताप आणि गोंधळाचे वातावरण निर्माण झाले होते.
स्टेशन रोडवर अचानक थरार
मिळालेल्या माहितीनुसार, शनिवारी दुपारच्या सुमारास रेल्वे स्टेशन परिसरातून एक चारचाकी वाहन भरधाव वेगाने जात असताना काही नागरिकांच्या नजरेस वाहनाच्या दरवाज्याबाहेर गायीचा पाय दिसल्याचा दावा करण्यात आला. यानंतर काही युवकांना संशय आल्याने त्यांनी तत्काळ वाहनाचा पाठलाग सुरू केला. काही अंतरावर वाहन अडवून पाहणी केली असता त्यामध्ये दोन गायी अत्यंत अमानुष पद्धतीने कोंबल्याचे दिसून आल्याचा आरोप करण्यात आला.
ही माहिती परिसरात क्षणार्धात पसरताच नागरिक मोठ्या संख्येने घटनास्थळी जमा झाले. सुरुवातीला वादावादी झाली; मात्र काही क्षणांतच वातावरण पेटले आणि संतप्त जमावाने वाहनातील दोघांना बाहेर काढून बेदम मारहाण सुरू केली. संतापलेल्या जमावाने वाहनावर दगडफेक करत काचा फोडल्या, दरवाजे उचकटले आणि वाहनाचे मोठे नुकसान केले.
संताप अनावर; काही काळ परिस्थिती नियंत्रणाबाहेर
प्रत्यक्षदर्शींच्या म्हणण्यानुसार, जमावाचा संताप इतका तीव्र होता की काही काळ परिस्थिती पूर्णपणे नियंत्रणाबाहेर गेल्याचे चित्र दिसत होते. घटनास्थळी मोठ्या प्रमाणावर नागरिकांची गर्दी जमली होती. रेल्वे स्टेशन परिसरातील वाहतूक ठप्प झाली होती. परिसरात भीतीचे वातावरण निर्माण झाले होते.
घटनास्थळी उपस्थित काही नागरिकांनी प्रशासनावर गंभीर प्रश्नचिन्ह उपस्थित केले. “वारंवार गोवंश तस्करीच्या तक्रारी होत असताना पोलिसांची गस्त नेमकी कुठे आहे?” असा संतप्त सवाल नागरिकांकडून करण्यात आला.
“पोलिसांचे वाहन गेले… पण हस्तक्षेप नाही?”
या संपूर्ण घटनेदरम्यान पोलिसांच्या भूमिकेवरही प्रश्न उपस्थित होत आहेत. प्रत्यक्षदर्शींनी दिलेल्या माहितीनुसार, मारहाण सुरू असताना पोलिसांचे एक वाहन घटनास्थळावरून गेल्याचा दावा करण्यात आला; मात्र त्या वेळी कोणताही हस्तक्षेप झाला नसल्याचे सांगण्यात येत आहे. यानंतर जवळपास पाऊण तासानंतर पोलीस घटनास्थळी दाखल झाल्याची चर्चा परिसरात होती. या कथित विलंबामुळे नागरिकांमध्ये नाराजीचे वातावरण निर्माण झाले.
आमदार अनुप अग्रवाल घटनास्थळी; शांततेचे आवाहन
परिस्थिती आणखी चिघळण्याची शक्यता निर्माण झाली असतानाच अनुप अग्रवाल घटनास्थळी पोहोचले. त्यांनी संतप्त जमावाची समजूत काढत शांततेचे आवाहन केले. त्यांच्या हस्तक्षेपानंतर परिस्थिती काही प्रमाणात नियंत्रणात आली. अन्यथा जमावाचा रोष आणखी भडकून गंभीर परिणाम घडण्याची शक्यता उपस्थित नागरिकांकडून व्यक्त करण्यात येत होती.
माध्यमांशी बोलताना आमदार अग्रवाल यांनी सांगितले की, “चार दिवसांपूर्वीच जिल्हा पोलीस अधीक्षकांकडे निवेदन देऊन गोवंश तस्करी रोखण्यासाठी कठोर उपाययोजना करण्याची मागणी केली होती. प्रशासनाने गायींची कत्तल रोखण्यासाठी ठोस कारवाई करावी. मात्र अशा घटना पुन्हा समोर येत आहेत, ही गंभीर बाब आहे.”
त्याचबरोबर त्यांनी नागरिकांनाही कायदा हातात न घेण्याचे आवाहन करत शांतता राखण्याचे सांगितले.
शहरात तणाव; प्रशासनावर प्रश्नचिन्ह
या घटनेनंतर धुळे शहरात काही काळ तणावपूर्ण वातावरण निर्माण झाले होते. परिसरात मोठ्या प्रमाणावर पोलीस बंदोबस्त तैनात करण्यात आल्याची माहिती समोर येत आहे. नागरिकांमध्ये भीती आणि संतापाचे वातावरण कायम असून गोवंश तस्करीचे प्रकार वाढत असल्याचा आरोप करण्यात येत आहे.
दरम्यान, या प्रकरणात पोलिसांकडून अधिकृत माहिती अद्याप समोर आलेली नसून संबंधित व्यक्तींवर कोणते गुन्हे दाखल झाले आहेत, याबाबत स्पष्टता नाही. पोलिस तपासानंतरच संपूर्ण घटनेचे सत्य समोर येणार आहे.
