ठाणे जिल्ह्यातील कल्याण पश्चिम परिसरात घडलेल्या एका धक्कादायक घटनेने संपूर्ण शहर हादरून गेले आहे. स्वतःच्या विवाहित मुलीची धारदार शस्त्राने हत्या केल्याचा संशय तिच्याच वडिलांवर व्यक्त करण्यात येत असून, आरोपी घटनेनंतर फरार झाल्याने पोलिस यंत्रणा सतर्क झाली आहे. या घटनेमुळे परिसरात भीती आणि संतापाचे वातावरण निर्माण झाले आहे.
मृत तरुणीचे नाव गायत्री शिंदे असे असून, संशयित आरोपीचे नाव विनोद वसईकर असल्याची माहिती पोलिस सूत्रांकडून मिळाली आहे. बाजारपेठ पोलिस ठाण्यात या प्रकरणी गुन्हा नोंदविण्याची प्रक्रिया सुरू असून, आरोपीच्या शोधासाठी विशेष पथकं रवाना करण्यात आली आहेत.
“मी आणि पप्पा घरी आहोत…”; आईला आलेला शेवटचा फोन
सोमवारी दुपारच्या सुमारास गायत्रीने आपल्या आईला फोन केला होता. “आई… मी आणि पप्पा घरीच आहोत,” असे ती शांतपणे बोलली होती. त्या वेळी कोणालाही कल्पना नव्हती की, काही तासांतच या घरात रक्तरंजित थरार उभा राहणार आहे.
रात्री कामावरून घरी परतलेल्या आईने घराचा दरवाजा उघडताच समोरचे दृश्य पाहून तिच्या पायाखालची जमीनच सरकली. घरात सर्वत्र रक्त पसरलेले होते आणि गायत्री रक्ताच्या थारोळ्यात निश्चल अवस्थेत पडलेली होती. मुलीची अवस्था पाहताच आईने आक्रोश केला आणि तत्काळ आपल्या मुलाला तसेच पोलिसांना फोन करून माहिती दिली.
CCTV फुटेजमध्ये धक्कादायक हालचाली
घटनेची माहिती मिळताच बाजारपेठ पोलिसांनी घटनास्थळी धाव घेत पंचनामा सुरू केला. प्राथमिक तपासात गायत्रीवर धारदार शस्त्राने वार करण्यात आल्याचे समोर आले आहे.
दरम्यान, इमारतीतील CCTV फुटेज तपासताना पोलिसांच्या हाती महत्त्वाचे धागेदोरे लागले. पोलिस सूत्रांच्या माहितीनुसार, संशयित विनोद वसईकर सकाळी कामावर गेल्यानंतर काही वेळातच पुन्हा घरी परतताना दिसतो. त्यानंतर दुपारी सुमारे चारच्या सुमारास तो अत्यंत घाईघाईने इमारतीतून बाहेर पडताना CCTV मध्ये कैद झाला आहे. त्या क्षणापासून तो फरार असल्याची माहिती समोर आली आहे.
या फुटेजनंतर संशय अधिक गडद झाला असून, पोलिसांनी आरोपीच्या शोधासाठी तीन विशेष पथकं तयार केली आहेत.
काही महिन्यांपूर्वीच झाले होते लग्न
कल्याण पश्चिमेतील पारेकरवाडी परिसरातील रचना रॉयल इमारतीत वसईकर कुटुंब वास्तव्यास आहे. विनोद वसईकर खासगी काम करत असून, त्याची पत्नी आणि मुलगा नोकरी करतात.
मृत गायत्री शिंदे हिचे नोव्हेंबर 2025 मध्ये लग्न झाले होते. काही दिवसांपूर्वी ती माहेरी आली होती. विशेष म्हणजे, घटनेच्या आदल्या दिवशी म्हणजे रविवारी संपूर्ण कुटुंब एकत्र चित्रपट पाहण्यासाठी बाहेर गेले होते. त्यामुळे घरात कोणताही तणाव असल्याचे शेजाऱ्यांनाही जाणवले नव्हते, अशी माहिती समोर येत आहे.
हत्या नेमकी का झाली? पोलिस तपास सुरू
स्वतःच्या मुलीची हत्या करण्याइतपत टोकाचे पाऊल एका बापाने का उचलले? घरगुती वाद, मानसिक तणाव की आणखी काही कारण? याबाबत अद्याप कोणतीही अधिकृत माहिती समोर आलेली नाही. पोलिसांकडून सर्व शक्य कोनातून तपास सुरू असून, आरोपीला अटक झाल्यानंतरच या निर्घृण हत्येमागील खरे कारण स्पष्ट होणार आहे.
दरम्यान, या घटनेमुळे कल्याण परिसरात मोठी खळबळ उडाली असून, “घरातच सुरक्षित नसलेल्या मुलींचं काय?” असा संतप्त सवाल नागरिकांकडून उपस्थित केला जात आहे.
